శరీరములో ఒక బాధ వచ్చినప్పుడు దానిని తట్టుకొని కొద్ది ఓపికతో ఉండ గలిగితే ఆ బాధను తగ్గించే
పదార్థాలను / ఔషధాలను శరీరమే నిర్మాణము చేసుకుంటుంది.

ఈ విషయాలన్నీ దృష్టిలో పెట్టుకొని మనకు భగవాన్‌ శ్రీధన్వంతరి ప్రసాదించిన వేద వైద్యము అయిన
ఆయుర్వేదములో తెలియచేసిన సులభమైన చికిత్సలను ''చిటుకు చికిత్సలు'' అనే ఈ పుస్తకము
రూపములో అందించాడు. గృహవైద్యము, ఇంటి వైద్యము, మొదలగు పుస్తకాలు ఎన్నో ప్రచారములో
ఉన్నప్పటికీ ఈ పుస్తకములో ప్రత్యేకముగా ఒక వ్యాధిలో ఎంతవరకు మనకు మనమే చికిత్సలను
చేసుకోవచ్చునో తెలియ చేసే ''హద్దును'' నిర్ణయించి తెలియచేయడం జరిగింది. దీని వలన స్వంత వైద్యముతో
వచ్చే అనవసర ప్రమాదాలను నివారించే ప్రయత్నమూ చేయబడినది. అదీకాక ఈ విధమైన ప్రకృతి
ప్రసాదించిన మందులను వాడడము వలన, సైడ్‌ ఎఫెక్ట్స్‌ లేక పోవటమే కాక, మన రోగనిరోధక శక్తి మరింత
పెంపొంది, కొత్త చీకాకులు కలిగే అవకాశము నశించిపోతుంది. దానితోపాటు ఆహారంలో పథ్యపానాల
వివరాలను గూడ శాస్త్రీయంగా ఈ చిరుపొత్తంలో పొందు పరచటం జరిగింది.