--

అంతర్ముఖుడైన రామమనోహరుడి కన్నులనిండా కలలే. కలలు జీవితంలో మనం కోల్పోతున్న వాటిని పూరిస్తాయి. చూడండి, ఈ సంపుటిలో ‘నిదుర చాటు దేహం’ కవిత. ‘నిదురలోకి దేహం’, ‘దేహంలోకి నిదుర’ ప్రవేశించే, ప్రవహించే క్రమాన్ని అవలీలగా పట్టుకున్నాడు కవి. సడి, చప్పుడు లేకుండా, నావ ఏటి నీటిలోకి జారినట్లు, ‘ఇసుక ఒడ్డు విరిగి నదిలోకి ఒరిగినట్లు నిదుట కరుగుతున్న దేహం’ ఈ కవితలో సమ్మోహనంగా కన్పిస్తుంది. నిదుర పూనిన దేహం స్వప్నాన్ని చెక్కుతుంది. ‘ఆ స్వప్నం ఒక వింత మృగమై దేహాన్నే ఉసిగొల్పుతుంది.’ ఆ వింత మృగం విచిత్ర విన్యాసాన్నే మనో వైజ్ఞానిక పితామహుడు సిగ్మండ్ ఫ్రాయిడ్ ఇలా సూత్రీకరించాడు.